الأعمال الكاملة: الجزء الأول

ازرع كل الارض مقاومة

ترمي في كل الارض جدور

إن كان ظلمه تمد النور

وإن كان سجن تهد السور

كون البادئ كون البادئ

كُل فروع الحق بنادق

غير الدم محدش صادق

من أيام الوطن اللاجئ

إلي يوم الوطن المنصور

ازرع كل الأرض مقاومة

خلي الاصل وخلي الدين

والحق الواحد شاهدين

خلي سلاحنا في كل يمين

ولا يضعف ولاعمره يلين

خلي الصبر شهور وسنين

يسند ظهر معديين

خلي عرقنا يلاقي جبين

يقطر منه علي فلسطين

وعيدان الحي الجايين

ينبتوا في الوطن المنصور

ازرع كل الأرض مقاومة

يالي جراحك والدة جراح

خللي في يد الجندي سلاح

زي العامل والفلاح

زي الثورة والاصلاح

ولا يقدر مؤمن يرتاح

ولا يفرح ويا الافراح

ولا يفرد علي عشة جناح

ولا يلقي اولاده ملاح

ولا يعرف في الدنيا صباح

الا في الوطن المنصور

ازرع كل الأرض مقاومة